SADS ten Parvon Spas Box 107 man

         Inrinni khan YMA Sub. Hqrs. hnuaia ruihhlo do pawl SADS te chuan Lalchhingpuii hnen atangin Parvon Spas Box 107 vel zet an  man a, hei hi tunlai khawlai rate ang chuan ` 5,08,250 man hu vel a ni a, hei hi ṭum khata Parvon Spas an man tam ber ṭum ni hiala hriat a ni. 

          Parvon neitu Lalchhingpuii hi tun hma pawhin vawi tam tak an lo man tawh thin a, awmna veng mumal sawi tur chiah nei lo  niin Ramthar Veng pawhin an veng chhung atanga an lo hnawhchhuah tawh a ni. SADS te hian tun tumah hian an thudawn  bawhzuiin Inrinni nileng khan an chhui a, a hnen atanga lei chhuakte atanga chhuiin, a kawltu chu midang daih an lo ni a.  Thahnem tak lo kawltu Lalengmawia Ramthar venga cheng hnen atangin an man chhuak a, khum hnuaiah a lo thukru a ni. SADS te hian Engmawia an man hnu ah, Box 20 dang, an huana a thuhruk pawh an man belh ta zel a, hengte hi sarangah Box 1 hu ang zelin an lo pack diat diat a, Rambo polythen chhungah a dah hlawm a ni. Chhingpuii hian Vairengte atangin Box 147 vel a la ngei nia an hriat thu SADS te chuan an sawi a, hengte hi Ningani zan khan a lo pe chhuak tawh nia sawi a ni bawk. Hetianga Chhingpuii’n a lo pek chhuah tawhte chu amah Chhingpuii ho hian zawn kual a ni ta a, an man belh zui ta zel a ni. Hetianga tam Parvon an neih avang hian a rate pawh a hniam deuh nia sawi a ni a, mum 3 `100 bawr vel ni thin chu Mum 4 ` 100 ah a tlahniam niin SADS te chuan an sawi bawk. Heng Parvon an man te hi Rambo Polythen 3 ngawt ah an dah a, a tam tham hle a ni. Chhingi hi Jail ah a tang rei thei tak tak lo tih SADS te chuan an sawi a, kan hnung lawk pawh khan a tang a, Thawhleni liam ta khan a rawn chhuak ve leh mai a, hetianga a tang rei thei lo em em mai hi SADS hruaitu te chuan mak an ti hle a ni tiin kan palai an hrilh. Parvon bakah hian ruihhlo chi dang, ‘Nitrosun’ chu Strip 28 zet a hnen atang hian an man bawk a, Parvon tiam loh hian heng Nitrosun an man sak zawng zawng hi ` 14,000 man hu niin an chhut bawk. Lalchhingpuii leh a thiante hi SADS te chuan Inrinni zan la la khan Excise kutah an hlan nghal a ni.