Silai hralhtu Lunglei Court-ah inlan

          Dt 16/7/11 zan dar 6:30Pm vel khan, South Vanlaiphai Police leh BSF(G) Branch Hqrs. Aizawl(Durtlang) chuan report an dawn bawhzuiin, South Vanlaiphai khua a awm, Abdul Malik(45) s/o Abdul Sushan of South Vanlaiphai inah AK-56 Rifle 1, Block No. 2565 leh Magazine pakhat chu Ngunthawng-liana (58) s/o Thangnghina of Sangau kut atangin an man. He Silai Butt No. leh Registration No. te hi nawhreh vek niin S. Vanlaiphai OC C. Lalthangliana chuan a sawi. Silai an manna pa Ngunthawngliana hi  nimin khan District Court Lungleiah hruai a ni a, Magistrate Silvie Z. Ralte chuan  Dt 1/8/2011 thleng remand turin a chungthu a relsak nghal. Hemi chungchangah hian Silaineitu a puh Ngunthawngliana chuan he Silai hi paihte sumdawng Kaplamthanga’n Myanmar atanga a rawn ken a nih thu leh Kaplamthanga hian Silai leiduh an awm leh awm loh a zawh hnuah Ngunthawngliana hian  tunhmaa Abdul Malik hian a lei duh tih a lo sawi tawh chu sawi chhawngin ani hian Adbdul Malik hnenah Rs 2,80,000/- a hralh tur leh a hralh manah Rs 5000 hlawh tur a a tih angin ani hian Vaipa hnenah hian hralh chhawnsak a tum ta niin a sawi. Inrinni chhun dar 10:00 vel khan Silai hi lei tumtu pa kutah chuan a hlan tih sawiin pawisa hi chu a hlan nghal lo niin a sawi bawk. Silai an in hlan lai hian buara chhungah  khung a nih thu a sawi a, Silai thar pawh a ni lo a ti. Hetihlai hian Police te chuan Silai lei chhawn tumtu Vaipa erawh an man lova, Silai hi khawi atanga rawn tawlh luh nge tih chu la chhui zui zel tur niin kan thudawnna chuan a sawi.